35-годишен маж спасен од урнатините 149 часа по земјотресите во Туркије

ХАТАЈ (АА) – Од урнатините по разорните земјотреси во турската област Хатај, дури 149 часа по првиот земјотрес, спасен е 35-годишниот маж Мустафа Сариѓул, известува Анадолу.

Сариѓул е спасен од урнатините на зграда во градот Антакија, во областа Хатај, по петчасовна акција за спасување, што започна откако спасувачите воспоставиле контакт со него.

Спасувачките екипи во трка со времето продолжуваат со претрагата и спасувачките акции во регионите погодени од земјотресите.

Потпретседателот на Туркије, Фуат Октај, синоќа информираше дека во земјотресите што ги потресоа јужните делови на Туркије, бројот на загинати се зголемил на 24.617.

Од подрачјето погодено од земјотресите во други делови на земјата се евакуирани повеќе од 86.000 лица.

– Разорните земјотреси кои ја потресоа Туркије на 6 февруари

Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.

Бројни спасувачки екипи сè уште ревносно работат на пребарување и спасување на луѓето затрупани во урнатините на зградите.

Во овие земјотреси што силно ги потресоа и северните делови на Сирија, животот го загубија повеќе од 3.500 лица, а над 5.200 се повредени.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..