На прашањето дали постојат гаранции дека Бугарија нема да поставува нови барања по евентуалното усвојување на уставните измени, Османи во разговор за германскиот весник вели дека бугарската политика е толку несигурна што никој не може да знае што ќе донесе следниот ден
Шефот на македонската дипломатија Бујар Османи во интервју за германскиот весник „Франкфуртер алгемајне цајтунг“ (ФАЦ) вели дека најдобрата гаранција за зачувување на македонскиот идентитет е, по влезот во НАТО, земјата да стане членка и на Европската Унија (ЕУ), пренесува „Дојче веле“ на македонски јазик.
Според министерот за надворешни работи, Северна Македонија е најмалтретираната земја во процесот на ЕУ.
На прашањето дали постојат гаранции дека Бугарија нема да поставува нови барања по евентуалното усвојување на уставните измени, Османи вели дека бугарската политика е толку несигурна што никој не може да знае што ќе донесе следниот ден.
„За жал, често сме биле разочарани, а динамиката во бугарската политика е толку несигурна што не се знае што ќе донесе утрешниот ден. Прилично сум сигурен дека Бугарија постојано ќе формулира нови барања. Но, за мене е важно што е на агендата на ЕУ, ништо друго“,
вели министерот за надворешни работи.
Тој вели дека земјава постигнала компромис со Бугарија – акциски план за малцинствата и оти сакаме темата да ја префрлиме од историски интерпретации и идентитетски прашања кон човековите и малцинските права, затоа што во тоа сме добри.
Ова, вели Османи, го кажува како човек кој не доаѓа од најголемата етничка група во С Македонија.
Земјава, посочува тој, изгради уникатен модел на функционална мултиетничка демократија, наспроти сите скептици кои сметаа дека на Балканот тоа не е можно.
Според шефот на дипломатијата, анкетите кои покажуваат дека големото мнозинство граѓани во земјава се против уставните измени се погрешно интерпретирани.
„Граѓаните го отфрлаат вметнувањето на идентитетско-политичките конфликти во процесот на проширување на ЕУ, но од претстојните уставни измени нема таква опасност, напротив“,
вели Османи, додавајќи дека тие „ќе ја зацврстат и прошират мултиетничката демократија“.
Османи вели оти е свесен за опасноста дека некои кругови во Бугарија ќе се обидат да ја злоупотребат ситуацијата на над 80.000 (според ФАЦ) македонски државјани кои поседуваат бугарски пасоши.
„Знам дека зад барањата за малцинските права стојат нечесни намери. Но, за мене поголема закана е дека сѐ додека нашите граѓани не се дел од ЕУ, тие ќе бидат принудени да аплицираат за бугарски пасоши од социјални и економски причини“,
вели Османи во интервјуто за ФАЦ.
ИЗВОР: 360stepeni.mk
