АНКАРА (АА) – Бројот на загинати во тековните израелски воздушни напади во Либан се искачи на 558 лица, соопшти денес либанскиот министер за здравство, Фирас Абијад, јавува Анадолу.
Меѓу загинатите има 50 деца и 95 жени, а повредени се најмалку 1.835 лица, додаде тој на прес-конференцијата во Бејрут.
„Повеќето од жртвите во израелските напади од вчера наутро се беспомошни цивили во нивните домови. Со ова се побиваат наводите на непријателот за нишанење борци“, нагласи министерот.
Израелските напади принудија илјадници Либанци да ги напуштат своите домови во јужен Либан бегајќи кон главниот град Бејрут и северните делови на земјата, јави репортерот на Анадолу.
Израелската Армија тврди дека погодила над 1.100 цели на Хезболах во последните 24 часа во јужниот и источниот дел на Либан, користејќи над 1.400 видови различни муниција во околу 650 налети на нејзините борбени авиони.
Хезболах и Израел разменуваат прекуграничен оган од почетокот на израелската војна во Газа, во која од 7 октомври загинаа над 41.400 Палестинци, од кои мнозинството жени и деца.
Израелските сили ги интензивираа нападите врз Либан игнорирајќи ги предупредувањата на меѓународната заедница дека ризикуваат проширување на конфликтот од Газа во други региони.
Извор: Anadolu Agency (AA)
