Триесет години Општина Чучер Сандево беше оставена на страна, ограбувана од оние кои гледаа само лична корист. Чучер Сандево како да беше привилегирана фирма на поединци сите овие години, истакна на денешниот митинг кандидатот за градоначалник на Општина од ВМРО-ДПМНЕ, Зоран Бајовски.
Бајовски, кој воедно е и првиот кандидат за градоначалник на Чучер Сандево директно од редовите на ВМРО-ДПМНЕ, потенцираше дека општината е со најголем еколошки потенцијал, чист воздух и живот.
-Во моментов на територија на Општина Чучер Сандево има 32 диви депонии, приоритет ќе биде уште во првите 100 дена да ги расчистиме. Имаме конкретен план и стратегија за измени во функционирањето на комуналното претпријатие, собирање на комуналниот отпад се со цел да останеме еколошки чисти, нагласи Бајовски.
Тој посочи дека планирана е набавка на три противпожарни возила и формирање на доброволно противпожарно друштво.
Како дел од проектите кои Бајовски ги планира во Општината се патишта, водовод и канализација за достоинствен живот на секое домаќинство, ефикасно улично осветлување, социјална правда за сите категории, подобра здравствена заштита на сите граѓани, бесплатен одмор за сите деца од социјално ранливи групи.
Најави и формирање на бизнис клуб, општински координатор за земјоделие и јавно планирање, како и координатор туризам на Скопска Црна Гора, бидејќи како што посочи, општината има голем туристички потенцијал.
Извор: kurir.mk
