Во училишните згради не е пронајден експлозив, а засега нема информации за напади врз ученици и наставници. Поради заканите, многу училишта биле затворени како мерка на претпазливост, иако повеќето од нив се повторно отворени
Јапонската полиција трага по лице кое испратило предупредувања за поставени бомби и смртни закани до стотици училишта, што довело до нивно затворање, пишува Би-би-си.
Заканите биле испратени по факс до средните училишта и универзитетите од број регистриран во Токио. Во Јапонија сè уште најчесто се користат факс машини. Во училишните згради не е пронајден експлозив, а засега нема информации за напади врз ученици и наставници.
Заканите за бомби се ретки во Јапонија, која е позната по ниската стапка на криминал. Првиот бран пораки започнал во понеделникот до училиштата и универзитетите ширум земјата. Во една префектура, Саитама, повеќе од 170 училишта добиле закани за бомби.
Локалните медиуми објавија дека во една порака се тврдело оти биле поставени повеќе од 330 бомби, додека друга гласела: „Поставив голема бомба“. Некои извештаи велат дека со пораките се барале откупнини од 300 000 јени (2 320 долари) до 3 милиони јени.
Во вторникот, пораки со закани за убивање на ученици и професори со рачно изработено оружје биле испратени од истиот број до средните училишта во различни префектури, вклучително и Осака, како и Саитама и Ибараки во близина на Токио. Поради заканите, многу училишта биле затворени како мерка на претпазливост, иако повеќето од нив се повторно отворени.
Извор: 360stepeni.mk
