Вучиќ вели ќе продолжат коректните односи со Москва, Хил порачува Белград да се усогласи со ЕУ во однос на санкциите

Вучиќ ова го изјави по средбата со рускиот амбасадор во Србија, Александар Боцан Харченко, која ја оцени како „добра и корисна“. Како што изјави Вучиќ на Инстаграм, со рускиот амбасадор разговарале и за билатерални прашања и за позицијата на Србија во однос на Косово

Американскиот амбасадор во Србија денеска пред новинарите во Белград, пак порача дека е неопходно, доколку Србија треба да проголта некоја горчлива таблета, најдобро е тоа веднаш да го направи

Српскиот претседател Александар Вучиќ денеска ијзави дека дека Белград ќе продолжи да одржува коректни односи со Русија.  

Вучиќ ова го изјави по средбата со рускиот амбасадор во Србија, Александар Боцан Харченко, која ја оцени како „добра и корисна“, пренесува регионалниот сервис на Радио Слободна Европа (РСЕ). 

Како што изјави Вучиќ на Инстаграм, со рускиот амбасадор разговарале и за билатерални прашања и за позицијата на Србија во однос на Косово. 

Од друга страна, пак, американскиот амбасадор во Србија, Кристофер Хил истовремено денеска изјави дека е „непходно“ Србија, која е на европскиот пат , да се усогласи со политиката на Европската Унија (ЕУ) во однос на санкциите кон Русија. 

„Никогаш не би го употребил зборот Србија „мора“, тоа што го велам е, имајќи предвид дека Србија е на (европскиот) пат и сите знаеме дека тоа е патот кон ЕУ и дека порано или подоцна ќе стигне таму, неопходно е да се усогласи со политиката на Унијата“,

рече Хил. 

Тој пред новинарите во Белград порача дека е неопходно, доколку Србија треба да проголта некоја горчлива таблета, најдобро е тоа веднаш да го направи. 

„Со оглед на тоа што речиси сите земји во Европа сфатија дека на Русија не може да ѝ се дозволи да продолжи да прави работи како овие што ги прави на својот сосед (Украина), очекуваме дека Србија, исто така, ќе се приклучи на заедницата на народи (ЕУ) кои ова го разбраа на време“,

изјави Хил, пренесува Бета. 

Србија е единствената земја во регионот која нема договорено единствена политика на санкции против Русија од почетокот на војната во Украина. 

Европските претставници редовно го предупредуваат официјален Белград дека од Србија како земја кандидат се очекува постепено да ги усогласува своите политики со оние на ЕУ. 

Неусогласувањето на политиката на санкции кон Русија е главната причина поради која Србија минатата година не отвори ниту еден кластер од  пристапните преговори со ЕУ. 

Инаку, од почетокот на војната во Украина, ЕУ воведе десет пакети санкции против Русија.