Вучиќ закажа седница на Советот за национална безбедност по тензиите во Косово

Првиот напад на Срби на северот на Косово и Метохија, Србија нема да седи со скрстени раце, порача Вучиќ на вечерашниот митинг

Советот за национална безбедност на Србија утре ќе одржи седница по повод денешните тензии на северот на Косово во општините со мнозинство српско население.

Како што најавија од Претседателството, седницата ќе се одржи во 9 часот.

Претседателот Александар Вучиќ на вечерашниот митинг во Белград зборуваше за ситуацијата на Косово при што ја најави седницата.

Пред нас, рече тој, е тежок период за прашањето со Косово, веројатно најтежок.

„Ќе се борам за секоја секунда мир, мирот да трае подолго, но првиот напад на Срби на северот на Косово и Метохија, Србија нема да седи со скрстени раце. Сакате да протерувате Срби? Нема да ги протерувате“,

порача Вучиќ.

Тој претходно во текот на денот издаде наредба да се подигне борбената готовност на војската на највисоко ниво.

Тензиите во општините со мнозинско српско население во Косово се случија откако новоизбраните градоначалници на изборите што ги бојкотираа Србите денеска ги презедоа функциите и влегоа во општинските згради. Во судир на косовската полиција со Србите беа повредени десетина лица. Полицијата со возила го блокираше пристапот до зградите, кои граѓаните сакаа да го одбранат, и им помогна на новите градоначалници на Звечан, Зубин Поток и Лепосавиќ да влезат во новите канцеларии.

Постапките на косовските власти наидоа на осуда од меѓународната заедница. Државниот секретар на САД Ентони Блинкен го повика премиерот Албин Курти да го смени курсот и потенцираше дека Косово постапува спротивно на советите од САД и европските партнери. Ваквите постапки, порача тој, ќе се одразат на билатералните односи меѓу Косово и Србија. ЕУ, пак, нагласи дека нема да прифати никакви дополнителни еднострани или провокативни дејствија и порача дека приоритет треба да бидат зачувување на мирот и безбедноста на теренот.

*Други поврзани вести:

• (ВИДЕО) Хаос во Косово: Фрлен солзавец, се слушаат рафали, Вучиќ ја подигна борбената готовност на војската
• (ВИДЕО) Десетина повредени во конфликтот меѓу полицијата и граѓаните во Звечан, барикади во Лепосавиќ
• Блинкен со остра реакција за случувањата на северот на Косово: Курти да го смени курсот, ова ќе има последици
• И ЕУ со осуда за тензиите на северот на Косово: Нема да прифатиме дополнителни провокации
• Османи во улога на претседавач со ОБСЕ повика да се смират тензиите на северот на Косово