Власта преговара за сигурно двотретинско мнозинство во Собранието. Велат дека кога ќе дојде време ќе информираат за кои пратеници станува збор. Тие повикуваат да им се придружат сите што ги споделуваат нивните политики. Во Собранието се очекува да се најдат повеќе закони за кои се потребни 80 гласови „за“, а меѓу нив и за оној што ќе овозможи спојување на Агенцијата за национална безбедност и Агенцијата за разузнавање.
„Прво нека се најде законот на дневен ред, се надевам дека ќе се обезбеди двотретинско мнозинство колку што е и потребно. Јас сум убеден во тоа.“, вели Малиша Станковиќ.
Категорично против намерата за спојување на агенциите е опозициската СДСМ, а Европскиот фронт се уште не открива како ќе гласа.
„Допрва ќе излеземе со прес за ова прашање“, вели Рина Ајдари.
Опозициската пратеничка Славјанка Петровска, во интервју, истакна дека власта нема капацитет да ги спои двете агенции. Сепак, според неа, решението наскоро ќе биде пред пратениците за да се избегне повлекување од назначувањето на Бојан Христовски како прв човек на АНБ.
„Тоа ќе им биде еден исто така, во наводници, елегантен начин како тие да го избегнат повлекувањето на овој директор. Едноставно ќе назначат нов на таа заедничка разузнавачка служба“, вели Славјанка Петровска.
Во Обвинителството претходно беа споени две кривични пријави кои се однесуваат на назначувањето на Христовски за директор. Наводно, спорен е неговиот сертификат за познавање на англиски јазик издаден во Пловдив, Бугарија. Од Обвинителството за ТВ21 велат дека процесот е во предистражна фаза и обвинителите преземаат дејствија за да се утврди состојбата, но не откриваат какви.
ИЗВОР: ТВ 21
