(ВИДЕО) Уапсени се најголемите дилери на кокаин од регионот, соопшти српската полиција

Српското МВР во координација со Европол уапсиле 13 лица, членови на организирана криминална група составена од неколку независни ќелии, кои функционирале како балкански картел

Во голема полициска акција во Србија уапсени се водачи на балкански картел кој во последните години организирал шверц на повеќе од седум тони кокаин во Европа, тврдат официјални лица од српското МВР.

„Уапсените во Србија се најголемите шверцери на кокаин од Балканот. Од 13 уапсени, тројца се веќе во затвор. Претресени се повеќе од 20 локации каде е пронајдена поголема сума пари и оружје. Работата на овој случај се уште трае“,

изјави на прес конференција шефот на Управата на криминалистичката полиција на Србија, Нинослав Цмолиќ.

Цмолиќ рече дека во координација со Европол уапсени се 13 лица, членови на организирана криминална група составена од неколку независни ќелии, кои функционирале како балкански картел.

„Во соработка со Европол, Србија успеа да ги идентификува клучните цели на нејзината територија и да ги мапира нивните криминални активности низ светот. Се верува дека овој картел стои зад пратките од повеќе тони кокаин кои во Европа пристигнале од Колумбија, Бразил, Еквадор, но и преку Западна Африка како логистичка транзитна поддршка“,

рече Цмолиќ.

Според него, таа меѓународна акција резултирала со отстранување на најголемата криминална организација за трговија со дрога од Балканот.

Лицата биле уапсени во акција спроведена во повеќе градови во Србија.

Цмолиќ рече дека на територијата на Србија уапсени се М.С. и М.Л., осомничени дека се организатори на криминална група и уште 11 лица осомничени дека се водачи на независни ќелии на криминална организација.

Како што рече Цмолиќ, информациите од мобилната апликација „Скај“ биле клучни за разоткривање на картелот.

„Благодарение на анализата направена врз основа на податоците од апликацијата ‘Скај’, најмалку седум тони кокаин запленети во текот на 2020 година се поврзани со лидерите уапсени денес и претходно уапсените членови на споменатиот картел, а тоа се запленети пет тони кокаин во Аруба, Холандски Антили, 1,2 тони кокаин запленети во Хаселт, Белгија, како и 743 килограми кокаин запленети во Ротердам, Холандија“,

рече Цмолиќ.