Ваквата одлука била донесена на денешната владина седница како израз на солидарност и спомен на загинатите во катастрофалниот земјотрес во Турција и во Сирија, чиј број, според последниот биланс, се искачи на над 33 000
Националното знаме на земјава утре ќе се вее на половина копје.
Владата одлучи утрешниот ден (13 февруари) да го прогласи за ден на национална жалост за жртвите од катастрофалниот земјотрес кој пред неполна седмица ги погоди Турција и Сирија.
Ваквата одлука била донесена на денешната 103. владина седница како израз на солидарност и спомен кон загинатите во земјотресот, чиј број, според последниот биланс, се искачи на над 33 000.
„За време на утрешниот Ден на жалост, знамето на Република Северна Македонија ќе биде истакнато на половина копје, во нашата држава и пред дипломатско-конзуларните претставништва во странство. Владата на Република Северна Македонија изразува длабоко сочувство за загубите, до целиот турски народ и до блиските на настраданите во земјотресот во Турција и во Сирија“,
пишува во владиното соопштение.
Во објава на Фејсбук, премиерот Димитар Ковачевски порача дека како држава и народ ќе продолжиме да бидеме солидарни и да им помагаме на оние кои загубиле сѐ.
Инаку, на денот кога Турција и Сирија беа погодени од земјотресот, Владата на вонредна седница одлучи во Турција да испрати спасувачки тим од 40 припадници на Дирекцијата за заштита и спасување, 22 припадници на Армијата и две кучиња трагачи кои ќе помагаат во санирањето на последиците од земјотресот.
Дополнително, Владата донесе одлука во Турција да биде испратен и хуманитарен пакет од 10 000 ќебиња и 200 санитетски носила за прва помош.
ИЗВОР: 360stepeni.mk
