ДОЊЕЦК (АА) – Украински војник со кодно име Санјок рече дека тенковите стационирани на линијата на фронтот во близина на градот Авдиивка играат важна улога во одржувањето на одбранбената линија во текот на судирите со руските сили, известува Анадолу.
„Се разбира, ја држиме линијата на одбраната благодарение на тенковите. Тенковите и артилерискиот систем се исклучително важни. Работата на тенковите, артилеријата и пешадиските единици се координирани“, изјави за Анадолу војникот со кодно име Санјок.
Тој рече дека руските сили од крајот на минатата година изведуваат интензивни напади врз градот Бахмут кој се наоѓа во близина, додавајќи дека руската војска сега се обидува да го заземе Авдиивка.
„Има судири во правец на Авдиивка, жестоки како во Бахмут, а можеби и поинтензивни“, додаде Санјок.
Тој истакна дека украинската војска се бори за територијален интегритет на земјата и е подготвена да служи на првата линија од фронтот до самиот крај.
Командантот со кодно име Каспер, рече дека се водат интензивни судири во регионот во кој тој е распореден.
„Тенкот е многу ефикасно борбено возило. Сите се плашат од него. Тенк може да пука од затворена или отворена позиција“, рече Каспер.
