АНКАРА (АА) – Најмалку 36.379 Палестинци се убиени во израелската офанзива врз Појасот Газа од 7 октомври минатата година, објави денес Министерството за здравство на опколената палестинска енклава, известува Анадолу.
Во соопштението на министерството на енклавата се додава дека уште 82.407 лица се повредени во нападите.
„Во израелските напади последните 24 часа се убиени 95 лица, а 350 се повредени“, се наведува во соопштението.
Во соопштението се додава дека многумина сѐ уште се заробени под урнатините и на патиштата бидејќи спасувачите не можат да стигнат до нив.
Израел пред 8 месеци започна брутална воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври.
Според податоците на Обединетите нации, израелските напади врз палестинската енклава го принудија населението на Појасот Газа внатрешно да се расели, предизвикувајќи акутен недостиг на храна, чиста вода и лекови, притоа разорувајќи ја и уништувајќи ја инфраструктурата на енклавата.
Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од милион раселени Палестинци побараа засолниште.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
Извор: Anadolu Agency (AA)
