АНКАРА (АА) – Турскиот национален авиопревозник „Туркиш ерлајнс“ превезе седум милиони патници во април, што е зголемување за 6,9 отсто во споредба со претходната година, се вели во соопштението објавено денес од Турската платформа за објавување на јавни податоци, јавува Анадолу.
Авиокомпанијата забележа раст на бројот на патници на меѓународни линии за 4,5 отсто, достигнувајќи 4,3 милиони во април, а бројот на домашни патници е зголемен за 11 отсто на 2,8 милиони во истиот период.
Факторот на оптоварување, односно зафатеноста на седиштата, се зголеми на 80,7 отсто во текот на минатиот месец, 86,5 отсто кај домашните летови и 80 отсто кај меѓународните летови.
Количината товар и пошта што ја транспортира компанијата се зголеми за 34,4 отсто на годишно ниво на 162.483 тони.
Во периодот од јануари до април авиокомпанијата превезувала 25,5 милиони патници, што претставува раст од осум отсто во однос на минатата година.
„Зафатеноста на седиштата достигна 80,5 отсто во првите четири месеци од годинава“, се наведува во соопштението.
Превезениот товар и пошта се зголемени за 35,1 отсто на околу 640.041 тон во периодот од јануари до април.
„Туркиш ерлајнс“ лета до 341 дестинација со својата флота од 455 авиони, вклучително патнички и товарни авиони.
Извор: Anadolu Agency (AA)
