Се прават безбедносни подготовки за можноста Трамп да биде обвинет во следните недели и да се појави во судница. „Асошиејтед прес“, повикувајќи се на анонимни извори, објави дека властите само се подготвуваат во случај на обвинение
Поранешниот претседател на САД, Доналд Трамп изјави дека очекува да биде уапсен во врска со истрагата од страна на окружниот обвинител на Менхетен следната недела и повика на протести поради тоа.
Во објава денеска на социјалните мрежи, Трамп, мислејќи на себе, рече дека „водечкиот републикански кандидат и поранешен претседател на Соединетите Американски Држави ќе биде уапсен во вторник следната недела“.
Тој се повикува на извори од канцеларијата на окружниот обвинител на Менхетен.
„Протест, да си ја вратиме нацијата назад“,
напиша тој.
Државниот обвинител на Њујорк води истрага против Трамп за плаќање мито на една порно-актерка. Адвокатите на Трамп наводно пред шест години ѝ платиле на Сторми Даниелс да молчи за нејзината наводна афера со Доналд Трамп, а њујоршкото обвинителство размислува околу можноста да покрене обвинение по таа основа.
Во меѓувреме, официјални лица за спроведување на законот во Њујорк прават безбедносни подготовки за можноста Трамп да биде обвинет во следните недели и да се појави во судница на Менхетен. Нема информација за какво било потенцијално гласање околу тоа дали да се подигне обвинение против Трамп или не.
„Асошиејтед прес“, повикувајќи се на анонимни извори, објави дека властите само се подготвуваат во случај на обвинение. Изворите ги опишале разговорите како прелиминарни и дека се разгледувала безбедноста, планирањето и практичноста на потенцијалното појавување на Трамп во суд.
Адвокатот на Трамп изјавил дека ако Трамп биде обвинет, ќе ги следат нормалните процедури. Од Канцеларијата на окружниот обвинител на Менхетен нема коментар.
Големата порота сослушуваше сведоците, вклучително и поранешниот адвокат на Трамп, Мајкл Коен, кој вели дека во 2016 година организирал исплати на две жени за да ги замолчи за сексуалните средби за кои рекле дека ги имале со Трамп една деценија порано.
Трамп негира дека се случиле средбите, вели дека не направил ништо погрешно, а истрагата ја оквалификува како „лов на вештерки“ од демократски обвинител кој сака да ја саботира претседателската кампања на републиканецот во 2024 година.
Извор: 360stepeni.mk
