Доверливите документи кои ги чувал Трамп се однесувале на: Нуклеарните програми на САД, одбранбените и вооружени способности, потенцијалните слабости на САД и сојузниците при евентуален воен напад и планови за евентуална одмазда како одговор на напад од странски сили
Новото обвинение за поранешниот американски претседател Доналд Трамп се однесува на лошо постапување и чување на стотици доверливи документи на САД, вклучително и за нуклеарните тајни и воените планови.
Медиумите денеска објавија детали од обвинението кое се состои од 37 точни (кривични дела). Станува збор за документи кои Трамп ги чувал на неговиот приватен имот на Флорида каде дел од нив биле и во салата за бал и во бањата.
Обвинението има и делови кои се однесуваат и на тоа што тој ги лажел истражителите и се обидел да ја попречи истрагата на тој начин што му сугерирал на неговиот адвокат да ги „скрие или уништи“ или да им каже на истражителите дека ги нема документите.
Доверливите документи кои ги чувал Трамп, пишува Би-би-си, се однесувале на: Нуклеарните програми на САД, одбранбените и вооружени способности, потенцијалните слабости на САД и сојузниците при евентуален воен напад и планови за евентуална одмазда како одговор на напад од странски сили.
Според обвинителите кои го гонат експретседателот, Трамп кога ја напуштил функцијата зел околу 300 доверливи досиеја кои ги чувал на неговиот луксузен имот во Палм Бич, Флорида.
Покрај за Трамп, обвинение во истиот случај беше поднесено и за неговиот личен помошник Волт Наута, кој се гони дека ги преместувал документите со цел да ги скрие од ФБИ.
Трамп вчера се огласи за ова обвинение велејќи дека зад него стои коруптивната администрација на актуелниот претседател Џо Бајден. Тој наведе и дека има покана да се јави во судот во вторник.
Трамп претходно беше обвинет и од Окружното обвинителство на Менхетен за фалсификување деловни документи во врска со пари платени на порноѕвезда во замена за молчење за аферата пред претседателската трка во 2016 година.
Извор: 360stepeni.mk
