Телефонски закани за убиство кон премиерот и министрите во Хрватска

Портпаролот на Владата потврди дека полиција дошла во владината зграда поради закани за убиство, а дел од медиумите пренесуваат дека телефонскиот повик бил направен од машко лице и дошол од странство

Телефонски закани кон премиерот на Хрватска Андреј Пленковиќ и министрите во Владата биле упатени денеска поради што е зголемено обезбедувањето.

Хрватското Министерство за внатрешни работи (МВР) соопшти дека распоредиле дополнителни сили околу зградата на Владата откако биле упатени телефонските закани.

Во утринските часови, како што наведоа, полициската управа во Загреб добила пријава од непознато лице, кое му се заканувало на премиерот и со оглед на сериозноста на заканите, дополнителни полициски сили биле испратени и распоредени.

Полициски службеници, наведоа, спроведуваат истрага со цел да се утврдат сите околности и да се идентификува лицето кое ги упатило заканите.

Владиниот портпарол, Марко Милиќ, пренесува „Индекс.хр“, исто така потврди дека полиција дошла во Владата поради закани за убиство на премиерот и членови на владата.

„РТЛ Денес“, пак, повикувајќи се на свои извори објави дека закани ги упатило машко лице, а телефонскиот повик бил од странство.