АНКАРА (АА) – Директорот на Светската здравствена организација (СЗО) за Европа, Ханс Клуге, говорејќи за земјотресите во јужна Туркије и Сирија, рече дека се сведочи на најголемата природна катастрофа во последните сто години, јавува Анадолу.
Светската здравствена организација покрена апел за помош и поддршка во вредност од 43 милиони долари за подрачјата погодени од земјотресите во Туркије и Сирија.
„Очекувам ова барем да се удвои во наредните денови бидејќи ќе добиеме подобра проценка за обемот на оваа криза и потребите“, рече Клуге.
Тој рече дека парите ќе бидат искористени за „да се обезбеди пристап до најранливите и тешко достапни граѓани, да се обезбеди посттрауматска рехабилитација и да се обезбедат основни лекови и комплети за итни случаи за да се пополнат итните празнини во здравствената заштита“.
Исто така, ќе се користат за „да се обезбеди витална ментална и психосоцијална поддршка на погодените граѓани и да се обезбеди континуитет на рутинските здравствени услуги, особено за жените, децата и постарите лица“.
Клуге додаде дека СЗО доставила најголем број тимови за итна медицинска помош во европскиот регион на СЗО во неговата 75-годишна историја.
Тој изјави дека досега во Туркије пристигнале 12 екипи на итната медицинска помош, а на пат се уште десет.
„Сега е време меѓународната заедница да ја покаже истата великодушност што Турција ја покажа кон другите нации низ годините“, нагласи Клуге.
Како што рече, Туркије примила 4,2 милиони бегалци, што е најголемата популација на бегалци во светот.
„Сведоци сме на најлошата природна катастрофа во европскиот регион на СЗО во последниот век. Закрепнувањето и заздравувањето ќе бара време и напор. Но, можам да ве уверам дека СЗО ќе остане непоколеблива, со народот на Туркије и Сирија, онолку долго колку што е потребно“, рече Клуге.
Батир Бердикличев, претставник на СЗО во Туркије, рече дека „сериозните оштетувања на водоводните и канализационите системи се загрижувачки и го зголемуваат ризикот од болести што се пренесуваат преку вода“.
Извор: www.aa.com.tr
