ИСТАНБУЛ (АА) – Генералниот секретар на Светската унија на муслимански научници Али Мохиедин ал-Карадаги изјави дека отпорот кон израелската окупација не е тероризам, јавува Анадолу.
Ал Карадаги во своето обраќање на 5-та конференција на Меѓупарламентарната платформа Ал Кудс во Истанбул го привлече вниманието на бруталните израелски напади врз Газа.
„Мораме гласно да кажеме дека отпорот кон окупацијата не е тероризам според небесните религии и според меѓународното право. Ова нека биде нашиот слоган, бидејќи непријателот и неговите соработници веруваат и сакаат да нѐ убедат дека е тероризам она што се случи на 7 октомври. “, рече Ал Карадаги.
Тој истакна дека палестинскиот народ, особено Палестинците во Газа, се целосно лишени од мирот и безбедноста.
„Ционистичките окупатори уништија сѐ во Газа“, додаде Ал-Карадаги, напоменувајќи дека Израел извршил масакр.
„Сите човечки вредности, меѓународни закони, меѓународни норми и цели врз кои се втемелени Обединетите нации (ОН) се целосно срушени“, изјави генералниот секретар на Светската унија на муслимански научници.
Прекршувајќи ја привремената одлука на Меѓународниот суд на правдата, Израел продолжува со нападите врз Појасот Газа, каде според палестинските здравствени власти од 7 октомври досега загинати се најмалку 34.388 Палестинци, главно жени и деца, а 77.437 се повредени.
Израел започна офанзива во Појасот Газа по прекуграничниот напад на палестинската група Хамас на 7 октомври.
Израелската офанзива принуди 85 отсто од населението на Појасот Газа внатрешно да се расели, предизвика акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена, според податоците на Обединетите нации.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарната помош да стигне до цивилите во Газа.
Извор: Anadolu Agency (AA)
