Сведоштва на преживеани од двата земјотреса во Турција: Мислевме дека се случува апокалипса

Вкупниот биланс на жртви во земјотресот во Турција и Сирија, чиј северозападен дел исто така се соочува со сериозен број на загинати од потресот во соседната земја, сега изнесува повеќе од 2 300 луѓе

Денеска во временски интервал помал од 12 часа во Турција се случија два потреси со разорна магнитуда. Првиот земјотрес се случи во текот на ноќта додека луѓето спиеја, а беше со магнитуда од 7,8 степени, што го прави еден од најсилните земјотреси во регионот во изминатиот еден век. Вториот со магнитуда од 7,7 степени според Рихтеровата скала се случи во 13:24 часот по локално време

Мелиса Салман, која живее во Кахраманмараш, изјавила дека живеењето во трусно подрачје значи дека е навикната на потреси, но вели дека она што се случило денеска било првпат да доживее такво нешто. „Мислевме дека е апокалипсата“, рекла Салман за АФП

Турската Агенција за управување со катастрофи попладнево соопшти дека бројот на загинати во разорниот земјотресот што утринава ја погоди земјата се искачи на 1 498 лица, јавува Би-би-си повикувајќи се на информациите на новинската агенција АФП.

Со ова, вкупниот биланс на жртви во земјотресот во Турција и Сирија, чиј северозападен дел исто така се соочува со сериозен број на загинати од потресот во соседната земја, сега изнесува повеќе од 2 300 луѓе.

Имено, според податоците на сириското Министерство за здравство, бројот на загинати во областите под контрола на владата во Дамаск се искачи на 430 лица, додека 1 280 се повредени. Во северозападниот дел на земјата, која не е под контрола на сириската влада, волонтерската организација „Бели шлемови“ – која дејствува во тој регион – соопшти дека животите во земјотресот ги загубиле најмалку 380 лица, а стотици се повредени.

Инаку, денеска во временски интервал помал од 12 часа во Турција се случија два потреси со разорна магнитуда. Првиот земјотрес се случи во текот на ноќта додека луѓето спиеја, а беше со магнитуда од 7,8 степени, што го прави еден од најсилните земјотреси во регионот во изминатиот еден век. Потресот бил почувствуван и на островот во Медитеранот – Кипар и во главниот град на Египет, Каиро.

Европскиот медитерански сеизмолошки центар (EMSC) денеска попладне соопшти дека втор земјотрес со јачина од 7,7 степени според Рихтеровата скала го погодил округот Елбистан во турската провинција Кахраманмарас. Според извештаите на Европско-медитеранскиот сеизмолошки центар, вториот земјотрес се случи во 13:24 часот по локално време. Земјотресот бил на длабочина од два километри, на оддалеченост од 67 километри североисточно од Кахранманмараш.

Засега не е познато колкава штета е направена од вториот земјотрес, кој исто така се почувствувал низ целиот регион.

Официјален претставник на турската Агенција за управување со катастрофи и вонредни состојби изјави дека тоа не бил последователен потрес и дека е независен од земјотресот утринава.

Најмалку 70 загинати веќе беа пријавени низ Кахраманмараш по првиот земјотрес.

Жителите на некои од градовите погодени од денешните земјотреси ги опишаа шокот и стравот од доживеаните и преживеани два големи потреси еден по друг.

Тулин Акаја, која живее во Дијарбакир, околу 290 километри источно од местото каде што се случија земјотресите, за новинската агенција АФП изјавила дека сè уште се обидувала да се смири од шокот по првиот земјотрес кога се случил вториот.

„Толку сум исплашена. Го почувствував толку силно затоа што живеам на горниот кат. Итавме надвор во паника. Сега не можам да се вратам во мојот стан – не знам што ќе се случи следно“,

рекла таа за АФП.

Мелиса Салман, која живее во Кахраманмараш, изјавила дека живеењето во трусно подрачје значи оти била навикната на потреси, но дека она што се случило денеска е прв пат да доживеат такво нешто.

„Мислевме дека е апокалипсата“,

изјавила Салман.

Халис Актемур, друг жител на Дијарбекир, беше меѓу првите што пристигнаа на местото на настанот по уривањето на првата голема зграда во градот и им се придружи на другите што помагаа да се извлечат преживеаните од урнатините, пишува Би-би-си.

„Успеавме да извлечеме три лица, но двајца беа мртви. По вториот земјотрес не можам да одам никаде. Мислам дека повторно ќе им треба мојата помош“,

рекол тој.

По двата разорни земјотреси и големиот број жртви и предизвикана материјална штета, голем број земји од светот најавија испраќање на помош во разни форми, од парична помош до специјализирани спасувачки тимови.

Министерството за надворешни работи на земјава денеска соопшти за двајца повредени ученици од С Македонија во првиот земјотрес што утрово го погоди југоисточниот дел на Турција.

Како што информираа од МНР, двајцата повредени ученици заедно со својот ментор/наставник биле дел од деветчлена група која земјотресот ја затекнал во градот Кахраман Мараш, во југоисточниот дел на Турција, каде што престојувале преку програмата „Еразмус плус“.

Инаку, вториот силен потрес што се случи денеска беше со епицентар оддалечен 67 километри од Кахраман Мараш оддалеченост.

Од МНР информираат дека ниту учениците ниту менторот се во животна опасност.

Министерството најави помош за Турција. Како што напиша шефот на дипломатијата на Фејсбук веќе се прават подготовки за испраќање на помошта.