Ова е првата пресуда согласно законот за ширење дезинформации кој беше усвоен од турскиот парламент во октомври минатата година, а за кој партијата на претседателот Реџеп Таип Ердоган рече дека ќе ја заштити јавноста од ширење на лажни или погрешни информации
Судот во Турција во вторникот осуди новинар на 10-месечна затворска казна поради ширење дезинформации.
Ова е првата пресуда согласно законот за ширење дезинформации кој беше усвоен од турскиот парламент во октомври минатата година, а за кој партијата на претседателот Реџеп Таип Ердоган рече дека ќе ја заштити јавноста од ширење на лажни или погрешни информации.
Новинарот Синан Ајѓул беше приведен на почетокот на декември лани откако на Твитер напиша дека 14-годишно девојче наводно било сексуално злоставувано од мажи, вклучително и полицајци и војници.
Тој потоа ја избриша објавата и се извини што ја напишал без потврда со властите, но подоцна беше уапсен.
На денешното прво рочиште зе случајот, судот го осуди Ајѓул на 10 месеци затвор, пресудувајќи дека тој ширел дезинформации што може да доведат до страв и паника кај јавноста. Новинарот ќе остане на слобода додека се чека жалба на казната.
Законот кој пред четири месеци беше усвоен од турските пратеници предвидува казна затвор до три години за секој што шири дезинформации за домашната и меѓународната безбедност, јавниот ред и здравје на Турција, а кои наводно имаат цел да предизвикаат јавна загриженост, страв и паника кај јавноста.
Ваквите законски измени наидоа на бурни реакции од опозицијата која уште лани реагираше оти овој закон има за цел да ги замолчи критичарите на власта пред претседателските и парламентарните избори закажани за јуни.
Извор: 360stepeni.mk
