Столтенберг за почетокот на руската инвазија на Украина: Тоа не беше изненадување, знаевме дека војната ќе започне

НАТО мора да се подготви за долга конфронтација со Русија, бидејќи рускиот претседател Владимир Путин не покажува желба за мир една година по инвазијата на Украина, вели Столтенберг

Генералниот секретар на НАТО, Јенс Столтенберг, тврди дека ноќта пред почетокот на руската инвазија на Украина отишол да спие, знаејќи добро дека војната ќе започне за неколку часа.

„Отидов во кревет. Но, тоа беше многу кратка ноќ бидејќи знаев дека во некоја фаза, во рок од неколку часа, некој ќе ме разбуди – и токму тоа се случи. Околу четири часот ми се јави началникот на кабинетот и само накратко ми кажа дека почнале, што значи дека инвазијата започнала. Тоа не беше изненадување, бидејќи знаевме“,

рече шефот на НАТО во интервју за АФП.

Додека многумина ширум светот се надеваа до крај дека Москва нема да ризикува напад од целосен обем, генералниот секретар на НАТО немал сомнеж дека Путин е подготвен да тргне во напад.

„Можно е да се шокирате од бруталноста на војната. Но, нема начин да се изненадите бидејќи ова е навистина нешто што беше предвидено неколку месеци пред инвазијата“,

истакна тој.

Нов бран руски ракетни напади врз Украина, погодена критична инфраструктура во Лавов

Речиси една година по почетокот на војната која чинеше десетици илјади животи и ја поткопа безбедноста на Европа, Столтенберг предупредува дека НАТО мора да биде подготвен за нова ера на конфликт со Русија која може да трае долго.

НАТО мора да се подготви за долга конфронтација со Русија, бидејќи рускиот претседател Владимир Путин не покажува желба за мир една година по инвазијата на Украина.

„Мораме да бидеме подготвени на долг рок, тоа би можело да потрае многу, многу години“,

изјави Столтенберг.

Тој додаде дека Путин „сака поинаква Европа, Европа во која ќе може да ги контролира своите соседи, каде што ќе може да одлучи што можат да направат земјите“. Столтенберг рече дека 30-те земји членки на НАТО се порешителни Украина на крајот да победи.

„Тука сме за да обезбедиме Украина да победи во оваа војна и да и обезбедиме оружје, муниција и поддршка што и се потребни. Ако претседателот Путин победи во Украина, тоа ќе биде трагедија за Украинците. Но, тоа ќе биде и опасно за сите нас, бидејќи тој и другите авторитарни лидери ќе бидат убедени дека можат да ги постигнат своите цели кога ќе употребат воена сила“,

рече Јенс Столтенберг. 

САД: Русите киднапираат деца од Украина и ги праќаат на превоспитување и посвојување во Русија