Не е донесена одлука за тоа кој ќе го наследи Столтенберг, но шпанскиот премиер Педро Санчез и британскиот министер за одбрана Бен Валас се меѓу водечките кандидати за оваа функција
Генералниот секретар на НАТО, Јенс Столтенберг, ќе го заврши својот мандат како што беше планирано – во октомври, велат од Алијансата, по објавите дека се работи за уште едно обновување.
„Мандатот на генералниот секретар Јенс Столтенберг беше продолжен три пати, а тој беше вкупно речиси девет години. Мандатот му истекува во октомври оваа година и тој нема намера да бара уште едно продолжување“,
рече портпаролката на НАТО, Оана Лунгеску.
Претходно, весникот „Велт ам Зонтаг“ објави дека мандатот на Столтенберг ќе биде продолжен, бидејќи Алијансата се обидува да ја одржи стабилноста за време на војната во Украина.
На Столтенберг, економист и поранешен лидер на норвешката Лабуристичка партија, минатата година му беше продолжен мандатот во НАТО.
Тој беше премиер на Норвешка во периодот 2000-2001 и од 2005 до 2013, пред да стане шеф на НАТО следната година.
Според „Велт ам Зонтаг“, членовите на Алијансата сакаат да му дадат можност на Столтенберг да претседава со самитот по повод 75 годишнината на организацијата во Вашингтон, во април 2024 година. Се прогнозира дека тој би можел да застане на чело на Светската банка, од каде Дејвид Малпас се повлекува истовремено.
Не е донесена одлука за тоа кој ќе го наследи Столтенберг, но шпанскиот премиер Педро Санчез и британскиот минситер за одбрана Бен Валас се меѓу водечките кандидати за оваа функција.
Извор: 360stepeni.mk
