Српскиот претседател ќе се обрати и на нацијата, а на седницата се очекува да ја извести Владата за состанокот со западните делегации во петокот, ден што тој го опиша како еден од најтешките за Србија
Владата на Србија утре во 11 часот ќе одржи седница на која се очекува да се разговара за прашањето за Косово.
На покана на премиерката Ана Брнабиќ, на седницата ќе присуствува и српскиот претседател Александар Вучиќ и се очекува дека тој ќе ја извести владата за преговорите со високата западна делегација.
Состанокот со „западната петорка“ (ЕК, САД, Франција, Германија и Италија) Вучиќ го одржа во петокот на кој, како што претходно јавија српските медиуми, се разговарало за таканаречениот француско-германски план за затворање на отворените прашања со Косово.
Овој состанок, Вучиќ го опиша како еден од најтешките денови за Србија, најави консултации и побара единство.
„Вчера беше еден од најтешките денови за Србија и никогаш не сум скрил од луѓето кога се случуваат вакви работи. Ќе има многу тешкотии и проблеми со кои ќе се соочиме во иднина и затоа ни е потребно единство“,
рече Вучиќ.
По седницата на Владата, според најавите, тој ќе има обраќање и до нацијата.
Извор: 360stepeni.mk
