Штрајковите, кои со месеци се повторуваат, го нарушија животот на Британците, а се уште не е најдено решение за спорот меѓу синдикатите и владата околу зголемувањето на платите и подобрувањето на работните услови
Десетици илјади училишта во Велика Британија делумно или целосно ја прекинаа наставата, прекинат е и железничкиот сообраќај, а се очекуваат доцнења на авионите бидејќи околу половина милион работници стапија во штрајк за да го зголемат притисокот врз Владата со барања за повисоки плати поради зголемување на цените.
Денешниот штрајк на работниците, најголемиот во Велика Британија по повеќе од десет години, беше организиран од сојуз на синдикати кои вклучуваат образование, државни службеници, јавен превоз.
Во наредните денови и недели се планирани повеќе протести во кои ќе се вклучат и медицински сестри и персоналот за итни случаи.
Штрајковите, кои со месеци се повторуваат во помал обем, го нарушија животот на Британците, а се уште не е најдено решение за спорот меѓу синдикатите и владата околу зголемувањето на платите и подобрувањето на работните услови.
Денешните координирани штрајкови со повеќе активности значат ескалација на протестните акции на синдикатите, кои последен пат беа организирани на ваков начин во Велика Британија во 2011 година, кога повеќе од милион работници во јавниот сектор организираа еднодневен штрајк во спорот за пензиите.
Инфлацијата во Велика Британија изнесува 10,5 отсто, што е највисока во последните 40 години, предизвикана од наглиот раст на цените на храната и енергијата.
Извор: 360stepeni.mk
