Предлогот на Кина кој повикуваше на прекин на огнот американските функционери го отфрлија по основа дека тоа ќе биде подарок за Москва која на тој начин ќе ги забетонира сите територијални придобивки што ги имала од инвазијата.
„Приватно пак, состаноците и предлозите предизвикаа чувство на непријатност во рамки на администрацијата, кои доведоа до прашања околу поширокиот пристап на САД кон двете држави.
Според еден претставник на администрацијата, САД е загрижен дека ќе биде дотеран во ќош околу кинескиот предлог. Без разлика на американската резервираност, директното отфрлање на предлогот ќе и дозволи на Кина да тврди пред други држави уморни од војната (и економската штета) дека Вашингтон не е заинтересиран за мир,“ пишува Иаин Марлов во текстот за Блумберг.
Процената на Блумберг е дека администрацијата на Бајден се обидувала да ја држи Кина на страна уште од почетокот на војната, но се случило токму спротивното, па и покрај тоа што Ши и Путин стануваат се поблиски, продолжува да расте бројот на држави кои се подготвени да ја слушнат и подржат Кина во наметнувањето на нејзиниот мировен план.
За време на целата војна Кина упорно се наметнува како сила незаинтересирана за плановите и одлуките на Западот, па таа ги игнорира американските санкции против нејзините компании што соработуваат со Русија, упорно купува нафта од Иран и помага во смирување на тензиите меѓу Саудиска Арабија и Иран. Во корист на Кина е и тоа што едни од најголемите светски економии Индија и Бразил одбиваат да се наклонат на страна на Западот, без разлика што притоа не ја заземаат и кинеската страна.
„Администрацијата на Бајден се обиде да ја натера Кина да ја конфронтира украинската криза по американски услови, меѓутоа Ши сега работи по свои услови.
И тоа мислам дека предизвикува одреден страв во администрацијата,“ изјавува за Блумберг, претседателот на Чајна стретеџис груп, Кристофер Џонсон.
Другата страна на ваквата состојба е дека како што Вашингтон зазема се поостар став кон Кина, така Кина почнува целосно да се откажува од надежта за подобрување на односите со САД во скоро време.
ИЗВОР: off.net.mk
