Минатата година Пригожин ги обиколи руските затвори во обид да ги убеди затворениците да се борат за „Вагнер“ во Украина, во замена ветувајќи амнестија по нивното враќање доколку преживеат
Водачот на руската платеничка милитантна група „Вагнер“ Евгениј Пригожин изјави дека на бојното поле биле убиени околу 10 000 затвореници што тој ги регрутирал да се борат во Украина.
„Зедов 50 000 затвореници, од кои околу 20 отсто беа убиени“,
изјави Пригожин во видео-интервју објавено вчера доцна вечерта, пренесува регионалниот сервис на РСЕ.
Минатата година Пригожин ги обиколи руските затвори во обид да ги убеди затворениците да се борат за „Вагнер“ во Украина, во замена ветувајќи амнестија по нивното враќање доколку преживеат.
Се верува дека осудениците биле користени како топовско месо во Украина, што претставува најголемиот дел од загубите на „Вагнер“.
Шефот на платеничката група вели дека сличен е процентот на убиени и меѓу оние кои потпишале договор со платеничката група, но не наведе прецизна бројка.
И платеничката единица и редовните руски трупи изминатиот викенд објавија дека по неколкумесечните борби градот Бахмут паднал во руски раце, но Киев веднаш ги негираше ваквите тврдења, наведувајќи дека украинските сили продолжуваат да се борат во овој град на истокот на земјата.
Инаку, Пригожин остро го критикуваше руското воено раководство, обвинувајќи го дека е едговорно за огромните загуби. Тој ги обвини рускиот министер за одбрана Сергеј Шојгу и началникот на Генералштабот Валериј Герасимов дека се неспособни и одговорни за бројот на жртвите.
„Сега има десетици илјади убиени. Веројатно ќе има стотици илјади. Не можеме да се сокриеме од ова“,
рече Пригожин.
Тој ја повика руската воена елита да ги испрати своите деца на фронтот.
Пригожин, кој е бизнисмен близок до рускиот претседател Владимир Путин, ја критикуваше руската елита, велејќи дека нивните деца живеат удобно додека мажите од сиромашните региони умираат во Украина.
Пригожин рече дека неговите борци ќе се повлечат од уништениот град до 1 јуни и ќе ја предадат контролата на руската армија.
На почетокот на мај, Белата куќа објави дека повеќе од 20 000 руски војници биле убиени, а уште 80 000 биле ранети во петмесечните борби во источна Украина, особено во Бахмут.
Извор: 360stepeni.mk
