Колку повеќе истражуваме, толку подлабока станува мистеријата за тоа кој ја изградил и каде е документацијата за спортската сала во ОУ Реџе Рушит Зајас. Заменик министерот за образование, Љуљзим Алиу вели дека салата не била дел од проектите на Министерството затоа немаат никаква информација и дека започнале да се интересираат по сторијата на ТВ21.
„Салата е изградена пред повеќе од една деценија на иницијатива на Министерството за локална самоуправа (тогаш на чело со министерот Муса Џафери). За жал, без комплетирање на потребната документација, туку само со идеја да се користи како политички ПР. Спортската сала каква што е не е и не била дел од проектите на МОН. Оттука, министерството нема никакви информации за нејзината изградба и функционирање“, рече Алиу.
Бидејќи Алиу го спомна Министерството за локална самоуправа, го прашавме тогашниот министер Муса Џафери, кој не се сеќава на конкретниот проект.
„Во моментов не се сеќавам како беше случајот! Искрено, Ви кажувам дека треба да се заинтересирам, за евентуално да прашам кои беа пречките што салата не е функционална! Во секој случај, јас сум на располагање за сите прашања што може да ги имате!“, рече Џафери.
Пред една недела од Министерството за локална самоуправа за ТВ21 изјавија дека нема ваков проект финансиран од ова министерство, но откако ТВ21 контактираше со поранешни директори, поранешни градоначалници на општини и со фирмата што ја заврши, ни рекоа дека министерството за кое станува збор беше финансиер на овој проект, поради што ТВ21 продолжува да биде во контакт со Министерството за локална самоуправа за дополнителни информации за спортската сала.
Од друга страна, бидејќи училиштата се во надлежност на општината, заменик министерот за образование ни рече дека на општината е да ја преземе салата во владение од Министерството за локална самоуправа и да обезбеди документи за салата да се стави во функција.
Последните информации на ТВ21 велат дека салата почнала да се гради во 2009/10 година, каде тендерот за истата го имала бугарска фирма, додека работите ги изведувала фирмата „Картел“ од Гостивар. Тогаш салата остана на половина, а работите продолжија во 2013/14 година од фирма „Инсаталими“ од Кичево. По завршувањето на салата, примопредавањето не беше извршено, и салата не беше пуштена во употреба.
ИЗВОР: ТВ 21
