Се намалува нивото на водата за ладење на реакторот на централата „Запорожје“, предупредува шефот на МААЕ

Нивото на водата во резервоарите во нуклеарната центрла „Запорожје“ опаѓа од пет до седум сантиметри на час, рече шефот на Меѓународната агенција за атомска енергија, Рафаел Гроси. Тој смета оти не постои ризик водата од резервоарите да исчезне веднаш, но предупреди дека состојбата е сериозна

Нивото на водата во резервоарите за ладење на реакторот во нуклеарната централа „Запорожје“ опаѓа за пет до седум сантиметри на час. Ова во интервју за Си-ен-ен го изјави шефот на Меѓународната агенција за атомска енергија (МААЕ), Рафаел Гроси, кој посочи дека доколку најголемата нуклеарна централа во Европа остане без вода, тоа би било многу сериозна ситуација.

Нивото на водата во резервоарите може да варира и натаму, но генералниот директор на МААЕ предупреди дека ситуацијата може да стане сериозна доколку резервоарите на нуклеарната централа останат без вода.

„Таму има резервоар и голем број внатрешни канали кои обезбедуваат водата постојано да циркулира за да може постојано да се ладат реакторите. Ако централата остане без вода, ќе имаме многу сериозна ситуација“,

изјави Гроси во интервју за Си-ен-ен.

Шефот на Меѓународната агенција за атомска енергија смета дека не постои ризик водата од резервоарите во централата „Запорожје“ да исчезне веднаш, но уште еднаш нагласи дека состојбата е сериозна поради намалувањето на нивото на водата.

„Ја следиме ситуацијата многу внимателно. Заедно со експерти од областа на нуклеарна безбедност, следната недела ќе одиме во ‘Запорожје’ за да добиеме покомплетна слика за состојбата на теренот“,

додаде Гроси.

Тој најави дека МААЕ ќе го зголеми бројот на своите инспектори во нуклеарната централа во Украина по уривањето на браната „Нова Каховка“ на реката Днепар, а дека Агенцијата внимателно ја следи состојбата за да се избегнат „радиолошки последици“.

Од почетокот на војната во Украина, нуклеарната централа „Запорожје“ неколку пати беше во критична ситуација поради гранатирање, што предизвика гасење на реакторот.

Сега ситуацијата повторно е неизвесна поради уривањето на браната „Нова Каховка“ и поплавите во населените места. Тоа, пак, предизвика пад на нивото на водата во системите за ладење на оваа нуклеарна централа.