Од кабинетот на собранискиот спикер Африм Гаши соопштија дека во денешната сообраќајна незгода на патот Охрид-Кичево, полициското возило во кое се наоѓаа припадници од неговото обезбедување излетало од патот. Тие патувале како дел од претходницата за неговата посета во Охрид.
Според соопштението, тројцата членови на обезбедувањето се здобиле со полесни телесни повреди, но нивната здравствена состојба е стабилна. Им е пружена медицинска помош и се наоѓаат во болницата „Свети Еразмо“ во Охрид.
По пристигнувањето во Охрид, Гаши се упатил во болницата за да се увери лично во здравствената состојба на повредените.
Во соопштението се додава дека сообраќајните несреќи, особено при лоши временски услови и на опасни патишта, се несреќна реалност. Кабинетот на Гаши изрази благодарност за брзата реакција на службите за итни случаи и лекарскиот тим, нагласувајќи дека безбедноста останува приоритет.
ИЗВОР: racin.mk
