Во Битола, каде што беше отворен клубот „Ванчо Михајлов“, се пријавиле само девет гласачи. Најмногу, пак, има во Кавадарци и во Прилеп – 42, односно 41
Додека годинава 169 лица ќе гласаат на избирачките места во Северна Македонија, на двата изборни циклуси во Бугарија во 2021 година, во земјава гласаа по 413 и по 510 лица
Само 169 бугарски државјани кои живеат во Македонија се пријавиле да гласаат на парламентарните избори во Бугарија што ќе се одржат на 2 април годинава.
Станува збор за лица кои ќе гласаат на избирачките места што на денот на изборите во Бугарија ќе бидат отворени во Северна Македонија, како и во други држави во Европа и во светот.
Списоците на пријавени за гласање се објавени на веб-страницата на бугарското Министерство за надворешни работи од седум избирачки места во исто толку градови во земјава, ќе се гласа во шест: Скопје, Битола, Кавадарци, Прилеп, Струмица и Тетово. Избирачко место е предвидено и во Охрид, каде што беше отворен и бугарскиот клуб „Цар Борис Трети“, но за таму не се пријавил никој.
„Списокот не е предмет на објавување бидејќи нема лица кои изразиле желба да гласаат“,
пишува за избирачкото место во Охрид.
Во шесте останати градови, пак, најмногу гласачи ќе има во Кавадарци и во Прилеп, а најмалку во Битола, градот во кој се отвори бугарскиот клуб „Ванчо Михајлов“.
Конкретно по градови, бројот на пријавени гласачи е:
- Скопје – 15 гласачи;
- Кавадарци – 42 гласачи;
- Битола – 9 гласачи;
- Прилеп – 41 гласач;
- Струмица – 22 гласачи;
- Тетово – 40 гласачи.
Ова е најмала бројка на гласачи од Северна Македонија во споредба со претходните два изборни циклуси во Бугарија. На изборите во јули 2021 година гласаа 413 лица, а во април 2021 гласаа 510. И во двата наврати, најмногу гласови освои партијата ВМРО-БНД на Красимир Каракачанов.
Бројот на лица кои на пописот во 2021 година во Северна Македонија се декларираа како Бугари, пак, беше 3 504.
ИЗВОР: 360stepeni.mk
