Додека меѓу членките на алијансата има очигледни разлики околу ова прашање, кои треба да бидат испеглани до самитот во јули, Зеленски јавно кажа дека ќе се појави на самитот во Вилнус само ако таму на Украина и бидат дадени јасни чекори кон членство во НАТО.
Алијансата уште во 2008 се согласи дека Украина некогаш ќе стане членка, но од тогаш нема ништо дополнето на таа тема. Во тоа време САД се залагаа за зближување на Украина кон НАТО, додека Франција и Германија беа против за да не се испровоцира Русија.
Столтенберг минатиот месец на земјите членки им претстави предлог документ за „практичната и политичка“ понуда за Киев, кој содржеше и предлог за нова декларација за врската на Украина со НАТО, која би се надоградила на изјавата од 2008.
За сега меѓу сојузниците има огромен опсег и несогласување околу тоа што точно треба да и се понуди на Украина во Вилнус, кој ќе треба да биде договорен во следните недели.
Она околу што се согласни сите 31 членка е дека членство на Украина на краток рок не е изводливо и не може сериозно да се дискутира за тоа дур трае војната.
Она околу што има голем судир е притисокот и согласноста на се повеќе членки за давање „политички пат“ на Украина за членство во Алијансата што би ги засилило врските меѓу двете страни. Главен противник на ова е САД, кои повеќе инсистираат на краткорочна воена, финансиска и хуманитарна помош, посебно во делот со снабдување на Украина со муниција.
Ставот на САД е дека сега треба да се спаси Украина како „суверена и независна држава,“ а дури потоа да се размислува за нејзино внесување во НАТО.
„Источноевропејците секако се обидуваат да дојдат до формула која ќе го започне процесот. Тие сакаат да не внесат во процес кој неизбежно води до нивната посакувана крајна цел (украинско членство) а други се колебаат за тоа,“ изјавил неименуван извор за Фајненшл тајмс.
ИЗВОР: off.net.mk
