ВАШИНГТОН (АА) – Белата куќа вчера соопшти дека сака граничниот премин Рафа меѓу опколениот Појас Газа и Египет да биде отворен што е можно поскоро откако израелските сили ја зазедоа областа, известува Анадолу.
Портпаролот на Советот за национална безбедност на САД, Џон Кирби, за новинарите изјави дека американскиот претседател Џо Бајден за време на телефонскиот разговор со израелскиот премиер Бенјамин Нетанјаху укажал на потребата брзо да се отвори граничниот премин Керем Шалом меѓу јужниот дел на Газа и Израел, бидејќи е главен влезен пат за испорака на хуманитарна помош.
Кирби додаде дека Нетанјаху го уверил американскиот претседател дека преминот ќе биде отворен многу брзо.
„Мораме да видиме дека ќе се случи тоа, но во моментов преминот е затворен. Рафа е исто така затворен и сакаме да го видиме отворен што е можно поскоро“, рече Кирби.
Тој нагласи дека од клучно значење е да се продолжи со испораката на хуманитарна помош за Газа.
„Тоа беше главната поента што претседателот Бајден ја кажа вчера во телефонскиот разговор со Нетанјаху, а ние го поддржавме тоа на други нивоа во администрацијата“, додаде Кирби.
Израелската војска вчера рано наутро соопшти дека нејзините сили ја презеле контролата врз палестинската страна на граничниот премин Рафа.
По најавата на палестинската група Хамас за прифаќање на катарско-египетскиот предлог за прекин на огнот во Газа, израелскиот воен кабинет одлучи да ја продолжи операцијата во Рафа со цел, како што наведе, „воен притисок врз Хамас за да се напредува во ослободувањето на заложниците и за други воени цели“.
Израелската Армија издаде итна наредба за евакуација на Палестинците во источните населби на Рафа и ги повика да се преселат во градот Ал-Маваси во јужниот дел на Газа.
Рафа е дом на повеќе од 1,5 милиони раселени Палестинци кои избегаа од војната откако Израел започна брутална воена офанзива врз Појасот Газа со неселективно бомбардирање на цивилните населби, училишта, верски објекти и болници по нападот на палестинската група Хамас на 7 октомври.
Оттогаш, во израелските напади загинаа повеќе од 34.700 Палестинци, главно жени и деца во услови на масовното уништување и големиот недостиг на неопходни средства.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
Извор: Anadolu Agency (AA)
