Засега нема коментар од Украина. Не е јасно дали наводниот напад претставува почеток на долгоочекуваната украинска контраофанзива за повторно заземање на дел од територијата преземена од руските сили по инвазијата во февруари 2022 година
Министерството за одбрана на Русија соопшти дека руските сили спречиле голема украинска офанзива во регионот Донецк и дека убиле стотици украински војници. Во соопштението на Министерството се вели дека Украина го започнала нападот во неделата (4 јуни), користејќи шест механизирани и два тенковски баталјони.
Илустративна фотографија: EPA-EFE/STR
„Утрото на 4 јуни, непријателот започна голема офанзива во пет сектори на фронтот во јужниот правец на Донецк. Целта на непријателот беше да ги пробие нашите одбранбени линии на според него, најранливиот дел од линијата на фронтот. Но, непријателот не ги постигна своите задачи – немаше успех“,
соопшти руското Министерство за одбрана на Телеграм.
Министерството за одбрана на Русија додаде дека во нападот руските сили убиле 250 украински војници, но и дека уништиле 16 тенкови, борбени возила на пешадијата и 21 оклопно борбено возило.
Засега нема коментар од Украина.
Не е јасно дали наводниот напад претставува почеток на долгоочекуваната украинска контраофанзива за повторно заземање на дел од територијата преземена од руските сили по инвазијата во февруари 2022 година.
Официјален Киев неодамна соопшти дека Украина е подготвена да ја започне својата контраофанзива против руските сили, но не откри кога би можела да се случи.
Во изјава за Би-би-си на 27 мај, секретарот на Советот за национална безбедност и одбрана на Украина, Олексеј Данилов, не именуваше датум за најавуваната контраофанзива, но кажа дека нападот за враќање на територијата од окупаторските сили на рускиот претседател би можела да започне „утре, задутре или за една недела“.
Порача дека Украина не смее да направи грешка со одлуката бидејќи, како што рече, ова е историска можност што не смее да се изгуби.
Извор: 360stepeni.mk
