Русија тврди дека американското беспилотно летало паднало поради остар маневар, борбените авиони не стапиле во контакт со него

Русија тврди дека дронот се урнал поради остри маневрирања што довело до губење на висината и уривање на „MQ-9“ во вода

Руски борбен авион не користел воздушно оружје ниту стапил во контакт со дрон на американските воздухопловни сили „MQ-9 рипер“ над Црното Море, се вели во соопштението на руското Министерство за одбрана.

„Како резултат на остро маневрирање околу 9:30 часот по московско време, беспилотното летало MQ-9 започна неконтролирано летање со губење на висината и се судри со површината на водата. Руските ловци не користеа оружје, не стапија во контакт со дронот и безбедно се вратија во својата домашна база“,

се наведува во соопштението на руското Министерство.

Во соопштението се наведува дека американското летало ги нарушило границите на подрачјето на режимот за користење на воздушниот простор над Црното Море, поради што биле испратени руски борбени авиони да го пресретнат.

„На 14 март 2023 година наутро, руските системи за контрола на воздушниот простор открија американско беспилотно летало ‘MQ-9’ кое лета над Црното Море во правец на државната граница на Руската Федерација. Дронот леташе со исклучени транспондери, прекршувајќи ги границите на привремениот режим на воздушен простор воспоставен за специјалната воена операција, доставен до сите корисници на меѓународниот воздушен простор и објавен во согласност со меѓународните стандарди“,

соопшти руското Министерството.

Американското воено воздухопловство соопшти дека руски борбен авион соборил беспилотно летало на американското воено воздухопловство над Црното Море, откако го оштетил пропелерот на дронот. Белата куќа ги нарекува постапките на Москва „небезбедни, непрофесионални и непромислени“.

Американските власти соопштија дека дронот летал над меѓународниот воздушен простор во моментот на инцидентот.

„Овој инцидент покажува недостаток на компетентност, покрај тоа што е небезбеден и непрофесионален“,

додаде американската команда.

По инцидентот Стејт департментот соопшти дека САД го повикале на разговор рускиот амбасадор во Вашингтон, Анатолиј Антонов.

Белата куќа објави дека САД ќе ги продолжат операциите над Црното Море и нема да бидат спречени од руското пресретнување на беспилотно летало во меѓународниот воздушен простор.

Инцидентот доаѓа во време на зголемени руско-американски тензии поради војната во Украина, која Русија ја започна на 24 февруари 2023 година.