Русија истрела суперсонични ракети во Јапонското Море 

Јапонскиот министер за надворешни работи Јошимаса Хајаши изјави дека Токио со внимание ги следи воените операции на Москва и додаде дека не е забележана штета по лансирањето на ракетите

Руската морнарица истрела суперсонични противбродски ракети врз симулирана цел во Јапонското Море, објави утрово руското Министерство за одбрана. 

 „Во водите на Јапонското Море, бродовите на Тихоокеанската флота истрелаа крстосувачки ракети ‘москит’ кон лажна непријателска цел“,

се вели во соопштението на телеграм-профилот на Министерството, пренесува регионалниот сервис на РСЕ.  

Целта, како што се додава, се наоѓала на оддалеченост од околу 100 километри и била успешно погодена со две крстосувачки ракети „москит“. 

Ракетата „P-270 Moskit“, која го носи и називот „SS-N-22 Sunburn“, според класификацијата на НАТО, е суперсонична крстосувачка ракета со среден дострел од советско потекло, способна да уништува бродови на оддалеченост до 120 километри. 

Јапонскиот министер за надворешни работи Јошимаса Хајаши изјави дека Токио со внимание ги следи воените операции на Москва и додаде дека не е забележана штета по лансирањето на ракетата. 

„Како што руската инвазија на Украина продолжува, руските сили исто така стануваат поактивни на Далечниот Исток, вклучително и околу Јапонија“,

рече Хајаши на прес-конференција. 

Лансирањето на ракетите доаѓа една недела откако два руски стратегиски бомбардери способни да носат нуклеарно оружје извршија прелет над Јапонското Море кој траеше повеќе од седум часа.  

Прашан за плановите на Русија да распореди тактичко нуклеарно оружје во Белорусија, Хајаши рече дека Јапонија го осудува потегот и бара Русија и Белорусија да престанат со акциите што дополнително ќе ги зголемат тензиите.