Рајчев останува обвинител во предметот за Стаменковски од „Доказ“ по обвинувањата дека соработувал со обвинетиот

Обвинителот Рајчев, претходно и во судница и пред камери, ги квалификуваше наводите на обвинетиот како невистини и нагласи дека воопшто не го познава Стаменковски ниту, пак, имал лична или каква било комуникација со обвинетиот

Обвинителот Сашо Рајчев од Вишото јавно обвинителство (ВЈО) останува обвинител во предметот за сопственикот на парапорталот „Доказ М“, Марјан Стаменковски, по обвинувањата од обвинетиот дека соработувал со него.

Обвинителот утрово се појави на продолжението на јавната седница во Апелацискиот суд Скопје откако републичкото обвинителство донело такво решение со оглед дека шефот на скопското ВЈО, Мустафа Хајрулахи, кој првично требаше да одлучи, се иззема од носење одлука поради спомнување на неговото име од страна на Стаменковски.

Јавната седница започна во средата, но на почетокот обвинетиот Стаменковски осуден на затворска казна од првостепениот суд, побара Рајчев да биде изземен тврдејќи дека обвинителот му давал информации за текстови објавувани на неговиот парапортал, вклучително и за неговиот шеф, Хајрулахи.

„Барам да се изземе почитуваниот обвинител поради судир на интереси бидејќи, според мои сигурни информации, лицето Сашо Рајчев има праќано информации кои се дел од предметите за што ме судите, но и за предмети за кои претседателот на Вишото јавно обвинителство Мустафа Хајрулахи има барано извинување од мене, но и за други предмети“,

рече Стаменковски.

Рајчев, пак, и во судница и пред камери, ги квалификуваше наводите на обвинетиот како невистини.

„Сметам дека денешното барање (за изземање) е еден од начините да се одолговлекува постапката и да се прават сензации како што се правеа сензации и во текстовите што тој ги објавуваше секојдневно и кои се предмет на оваа кривична постапка“,

изјави обвинителот нагласувајќи дека воопшто не го познава Стаменковски ниту, пак, тврди, имал лична или каква било комуникација со обвинетиот.

Денеска во Апелација тој и Стаменковски со неговите адвокати ќе се произнесат за затворската казна од три години и еден месец што ја доби сопственикот на „Доказ М“ од Основниот кривичен суд кој го прогласи за виновен за пет кривични дела – две за ширење расистички и ксенофобичен материјал и по едно дело: уцена, пиратерија на аудиовизуелно дело и злоупотреба на лични податоци.

Во Основното јавно обвинителство Скопје се води и втор предмет за Стсменковски кој се очекува да ги открие нарачателите и соработниците за текстовите што тој ги објавуваше на неговиот парапортал. Очекувањата се и да се дознае потеклото на парите кои беа пронајдени при претрес во неговиот дом, кој според неофицијални информации, биле во сума од околу 90 000 евра.