КУДС (ЕРУСАЛИМ) (АА) – Најмалку 67 Израелци се повредени, од кои четворица во критична состојба, при напад со дрон на Хезболах врз градот Хаифа, во северниот дел на Израел, соопшти денес Израелското армиско радио, пренесува Анадолу.
Дневниот весник „Израел Хајом“ објави дека голем број Израелци се ранети поради експлозијата на дрон во подрачјето на Бињамина во Хаифа.
Преку соопштение, либанската група Хезболах потврди дека лансирала рој офанзивни дронови врз кампот за обука на бригадата Голани во Бињамина, јужна Хаифа.
Радиото на израелската армија соопшти дека армијата отворила истрага поради неактивирањето на сирените кога дронот влегол во северен Израел.
Според весникот „Израел Хајом“, жителите на Хаифа и околните подрачја, меѓу кои и населбите Кирјат, слушнале експлозии без претходно активирање на сирените.
Ова се случува откако Израел на 23 септември започна масовни воздушни напади низ Либан против, како што тврди, позиции на Хезболах, во коишто досега се убиени најмалку 1.437 луѓе, повредени се над 4.123, додека раселени се повеќе од 1,34 милиони луѓе.
Воздушната кампања е ескалација на едногодишната прекугранична војна меѓу Израел и Хезболах од почетокот на неговата офанзива врз Појасот Газа, во која Израел уби речиси 42.200 Палестинци, повеќето жени и деца, по нападот на Хамас минатата година.
И покрај меѓународните предупредувања дека Блискиот Исток е на работ на регионална војна поради немилосрдните напади на Израел врз Газа и Либан, тој го прошири конфликтот на 1 октомври со започнување копнен упад во јужен Либан.
Извор: Anadolu Agency (AA)
