МОСКВА (АА) – Рускиот претседател Владимир Путин денеска изјави дека Русија ќе се фокусира на зајакнување на својата нуклеарна тријада, мислејќи на нуклеарните ракети базирани на копно, море и во воздух, јавува Анадолу.
Во телевизиското обраќање по повод одбележувањето на Денот на бранителот на татковината, државен празник во Русија, Путин рече дека „модерната и ефикасна армија и морнарица се гаранција за безбедноста и суверенитетот на земјата и гаранција за нејзиниот стабилен развој и нејзината иднина“.
„Ќе продолжиме да доставуваме напредна опрема за нашите војници, вклучувајќи нови системи за напад, опрема за извидување и комуникација, беспилотни летала и артилериски системи“, рече тој.
Путин ги даде овие коментари два дена по суспендирањето на Договорот за контрола на нуклеарното вооружување „Нов СТАРТ“ со САД поради нивната зголемена инволвираност во војната во Украина.
Рускиот претседател, исто така, изјави дека руската индустрија брзо го зголемува производството на целиот опсег на конвенционално оружје и се подготвува за масовно производство на напредно оружје.
„Како и досега, фокусот ќе го ставиме на зајакнување на нуклеарната тријада. Годинава на борбена задача ќе бидат ставени првите лансери на ракетниот систем „Сармат“ со новата ракета.“
„Ќе продолжиме со целосно производство на хиперсонични системи „Кинжал“ и ќе започнеме со масовно распоредување на хиперсонични ракети „Циркон“, лансирани од море“, рече тој.
Тој додаде дека штом нуклеарната подморница „Бореј-А“ ќе биде префрлена во морнарицата, ќе биде завршена обновата на поморските стратешки нуклеарни сили, а уделот на модерното оружје и опрема ќе достигне 100 отсто.
„Нашиот народ верува во вас, бранителите на Русија, во вашата способност, решителност и посветеност на татковината и заклетвата. Милиони луѓе ги следат своите срца помагајќи им на нашите војници на првата линија на фронтот, а ова нераскинливо единство е клучот за нашата победа“, рече рускиот претседател.
Путин, исто така, положи венец на Споменикот на непознатиот војник во Москва, традиционална церемонија со која се одбележува споменот на сите бранители кои некогаш се бореле за Русија.
Извор: www.aa.com.tr
