АНКАРА (АА) – Илјадници потрошувачи денес останаа без струја во Франција, откако синдикатот го прекина снабдувањето во знак на протест против владината реформа на пензискиот систем, јавува Анадолу.
Енергетскиот огранок на јавните служби на синдикатот на Генералната конфедерација на трудот (CGT) ја презеде одговорноста за прекинот на електричната енергија што ги зафати југозападните департмани Горна Гарона и Ариеж.
Дистрибутерот на електрична енергија „Енедис“ потврди дека 4.000 домаќинства во Горна Гарона и 14.000 во Ариеж, заедно со голем број фабрики, биле погодени од прекинот на струја.
Франција се соочува со постојани протести од 16 март, кога претседателот Емануел Макрон и премиерката Елизабет Борн решија да ги искористат уставните овластувања за да го усвојат Законот за пензиски реформи без одобрение од Парламентот.
Реформите вклучуваат зголемување на старосната граница за пензионирање од 62 на 64 години, како и најмалку 43 години работа за квалификација за полна пензија. Планот предизвика гнев кај граѓаните откако беше објавен минатата година, со масовни протести и штрајкови низ целата земја од јануари.
Француската Влада, пак, најави дека нема да ја повлече контроверзната пензиска реформа и покрај штрајковите, масовните протести и насилството во многу градови низ земјата.
Енергетските работници во март ветија дека ќе ја блокираат земјата со излегување од нафтените рафинерии и прекинување на работата на бензинските пумпи.
Извор: www.aa.com.tr
