Градоначалникот на општина Прилеп, Дејан Проданоски, денеска во Скопје учествуваше на настанот „Унапредување и зајакнување на меѓуопштинската соработка во локалната самоуправа“, во организација на Министерството за локална самоуправа, во соработка со УНДП и со поддршка на Владата на Швајцарија.
На настанот, на кој присуствуваа претставници на институции, општини и меѓународни организации, се разговараше за предизвиците и можностите за подобра координација помеѓу општините.
Проданоски истакна дека меѓуопштинската соработка се потврдува како клучен механизам за поефикасна испорака на услугите кон граѓаните, особено во услови кога општините се соочуваат со заеднички предизвици и ограничени ресурси.
Тој посочи дека посебен акцент бил ставен на имплементацијата на препораките од релевантните извештаи, како и на потребата од системски пристап во креирањето политики што ќе овозможат одржлив развој на локалната самоуправа.
Според него, ваквите настани се од големо значење за размена на искуства и градење партнерства, кои директно придонесуваат за поквалитетни услуги и подобар живот за граѓаните.
