Македонската полиција утринава на граничниот премин „Деве Баир“ не пропушташе бугарски државјани бидејќи, како што официјално соопшти МВР, компјутерскиот систем на граничните премини беше паднат. Ова предизвика револт кај група од 50-ина Бугари кои со навреди, недолично однесување и закани реагираат и бараат да бидат пуштени да одат на гробот на Гоце Делчев во Скопје
Тројца бугарски државјани денеска се приведени на граничниот премин „Деве Баир“ бидејќи се обиделе физички да нападнат полициски службеници, информираат од МВР.
„Околу 12.45 часот на Граничниот премин Деве Баир дошло до нарушување на јавниот ред и мир од страна на Г.З (35), А.Х (50) и Р.Х (54) бугарски државјани кои најпрво вербално, дрско и недолично со најпогрдни зборови се однесувале. Потоа се обиделе и физички да ги нападнат полициски службеници кои преземале службени дејства, при што се приведени и се работи на целосно расчистување на случајот“,
велат од МВР.
Како што информираа претходно од МВР, отстранет е дефектот на системот на сите гранични премини и се пропуштаат возила за влез и излез од земјава.
Од утринава неколку часа беше во прекин протокот на возила на граничните премини поради пад на системот. Поради тоа, на бугарските државјани кои денеска тргнаа кон Скопје да се поклонат на гробот на македонскиот револуционер Гоце Делчев им беше оневозможен влез во Македонија.
Ова предизвика тензии и расправии на граничниот премин „Деве Баир“ каде што бугарски државјани, поради неможноста да ја преминат границата, упатуваа навреди и недолично се однесуваа кон македонската гранична полиција.
ИЗВОР: 360stepeni.mk
