Предадени речиси 6 000 парчиња нелегално оружје во првите три дена од кампањата на српското МВР

Покрај оружјето, од 8 мај, кога започна акцијата, досега се предадени и 290 572 парчиња муниција, како и 488 минско-експлозивни средства. Кампањата на српското МВР уследи по двете масовни убиства што се случија белградското основно училиште „Владислав Рибникар“ и во селата кај Младеновац и Смедерево

Во првите три дена од кампањата на српското Министерство за внатрешни работи за предавање на нелегално оружје и муниција, предадени се 5 937 парчиња оружје, соопшти денеска Министерството, пренесува РТС.

Српското МВР на својот официјален профил на Инстаграм објави дека покрај речиси 6 000 парчиња оружје, од 8 мај, кога започна акцијата, предадени се и 290 572 парчиња муниција, како и 468 минско-експлозивни средства.

„МВР ги повикува граѓаните до 8 јуни да го предадат нерегистрираното оружје и експлозивните направи во најблиската полициска станица или да да ги повикаат полициските службеници да дојдат на посочена адреса и да го преземат“,

се наведува во објавата.

Министерството објави и видеопорака во рамките на кампањата за доброволно предавање на оружје.

Според проценките на српската полиција, околу половина милион луѓе во земјата нелегално поседуваат оружје.

Граѓаните на Србија до 8 јуни ќе можат без санкции да го предадат нерегистрираното оружје во најблиската полициска станица. Во тој период граѓаните кои ќе го предадат нерегистрираното оружје нема да одговараат, ниту кривично ниту ќе сносат некакви последици и не мора да го докажуваат потеклото на оружјето.

Кампањата на српското Министерство за внатрешни работи за предавање на нелегалното оружје уследи по двете масовни убиства што се случија белградското основно училиште „Владислав Рибникар“ и во селата кај Младеновац и Смедерево. Во двата масакри беа убиени 17 лица, а над 20 беа ранети.