Папата Франциск: Жените размислуваат поинаку од мажите, тие се ориентирани кон иднината

Франциск назначи неколку жени на лидерски позиции откако стана папа, а минатата година рече дека „секогаш кога една жена добива позиција (одговорна) во Ватикан, работите се подобруваат“

Папата Франциск го осуди насилството и предрасудите врз жените и истакна дека обезбедувањето еднакви плати и можности за жените може да помогне да се создаде помирен и поодржлив свет. Во предговорот на книгата објавена на веб-страницата „Ватикан њуз“ на Меѓународниот ден на жената, Франциск ги нагласи разликите меѓу мажите и жените, но повика на „еднаквост во различностите“ на „игралиштето отворено за сите играчи“.

„Сакам да мислам дека жените, доколку може да уживаат целосна еднаквост на можности, би можеле во голема мера да придонесат за неопходните промени кон свет на мир, вклученост, солидарност и целосна одржливост“,

рече папата.

Тој накратко се осврна на Денот на жената на крајот од неговата неделна аудиенција на плоштадот „Свети Петар“, кога побара од толпата да „аплаудира за сите жени затоа што тие го заслужуваат тоа“.

Папата Франциск во минатото ја осудуваше дискриминацијата на жените, но како и неговите претходници, тој ги отфрли женските свештеници. Католичката црква учи дека само мажите можат да станат свештеници затоа што Исус избрал мажи за свои апостоли.

„Женското размислување се разликува од машкото. Тие посветуваат повеќе внимание на заштитата на животната средина, нивниот поглед не е свртен кон минатото, туку кон иднината. Жените разбираат дека раѓаат со болка за да постигнат голема радост: да дадат живот и да отворат огромни, нови хоризонти. Затоа жените секогаш сакаат мир“,

пишува папата во предговорот на „Повеќе женско лидерство за подобар свет“.

Папата посочи дека жените мора да бидат платени исто како и мажите за еднакви улоги и ја нарече разликата во платите „голема неправда“.

Тој го осуди насилството врз жените и потсети на говорот од 2021 година кога го нарече насилството врз жените „отворена рана што произлегува од патријархалната и мачоистичка култура на угнетување“.

Франциск назначи неколку жени на лидерски позиции откако стана папа, а минатата година рече дека „секогаш кога една жена добива позиција (одговорна) во Ватикан, работите се подобруваат“.