Додека Западот преговара за испорака на тенкови во Киев, Кремљ размислува за начини да ја „задави“ поранешната советска република Молдавија, изјави украинскиот претседател Володимир Зеленски во своето видеообраќање на конференцијата за безбедност во Минхен
Очигледно е дека Украина нема да биде последната станица на инвазијата на Владимир Путин. Додека Западот преговара за испорака на тенкови во Киев, Кремљ размислува за начини да ја „задави“ поранешната советска република Молдавија, изјави украинскиот претседател Володимир Зеленски во своето видеообраќање на конференцијата за безбедност во Минхен.
Зеленски ги повика западните лидери да не ја одложуваат испораката на оружје за неговата земја која безмалку една година е под инвазија на Руската Федерација.
„Одложувањето отсекогаш било и сè уште е грешка. Очигледно е дека Украина нема да биде неговата последна станица. Тој ќе го продолжи своето движење до крај вклучувајќи ги и сите други земји кои во одреден момент беа дел од советскиот блок“,
рече Зеленски во своето видеообрќање.
На Минхенската безбедносна конференција се очекува да присуствуваат околу 40 шефови на држави и 60 министри. Германскиот канцелар Олаф Шолц, францускиот претседател Емануел Макрон и американскиот потпретседател Камала Харис се меѓу учесниците на конференцијата.
Шолц, чија влада претходно се соочуваше со критики за бавната испорака на оружје за Украина, денеска ги повика другите европски земји да го забрзаат испраќањето тенкови во Киев, откако Германија вети дека ќе испорача тенкови „леопард 2“.
„Сојузниците кои можат да испорачаат борбени тенкови на Украина треба да го сторат тоа сега“,
изјави германскиот канцелар на Минхенската безбедносна конференција.
Апел за зголемена воена поддршка за Украина упати и францускиот претседател Емануел Макрон.
„Апсолутно мораме да ја интензивираме нашата помош и напорите за да се помогне отпорот на украинскиот народ и неговата армија и да им помогнеме да започнат контраофанзива која сама по себе може да овозможи веродостојни преговори дефинирани од Украина, нејзините власти и нејзиниот народ“,
изјави Макрон на Минхенската безбедносната конференција.
Минхенската конференција се одржува еднаш годишно и е фокусирана на одбраната и дипломатијата, а годинава во фокус ќе биде светското преструктурирање, предизвикано пред сé од воената агресија на Русија врз Украина.
Минхенската безбедносна конференција ќе трае до 19 февруари, а на неа присуствува и македонскиот премиер Димитар Ковачевски, придружуван од вицепремиерот за европски прашања, Бојан Маричиќ.
Извор: 360stepeni.mk
