Еден чувар загина, а две лица се повредени во пукање во Амбасадата на Азербејџан во Иран, соопшти полицијата, а Азербејџан нападот го оцени како чин на тероризам.
Напаѓачот со „калашников“ го убил шефот на обезбедувањето, соопшти азербејџанското Министерство за надворешни работи. Портпаролот на иранското Министерство за надворешни работи, Насер Канани, остро го осуди нападот додавајќи дека инцидентот се истражува.
Судијата Мохамад Шахрирари рече дека мотивите на напаѓачот биле лични. Тој истакна дека напаѓачот рекол оти неговата сопруга отишла во Амбасадата на Азербејџан во Техеран и не се вратила дома, па мислел дека е таму. Жената по потекло е од Азербејџан.
На социјалните мрежи е објавено видео од нападот од надзорната камера.
Азербејџанскиот претседател Илхам Алиев изјави дека нападот е тероризам и побара сторителот бргу да се казни. Министерството за надворешни работи на Азербејџан најави дека набргу ќе го евакуира персоналот на Амбасадата поради инцидентот. Изјавите на иранските власти не укажуваат на тоа дека нападот бил политички мотивиран.
Азербејџан овој месец го назначи својот прв амбасадор во Израел во услови на зголемени тензии со Иран. Израел има амбасада во Баку од раните 90-ти и во последните години му даде силна воена поддршка на Азербејџан, вклучително и во спорот за Нагорно-Карабах.
ИЗВОР: kurir.mk
