Пред два дена, Новак Ѓоковиќ го освои Adelaide International, турнирот што е загревање за Австралиа опен, кој почнува идната недела. Победата има особена симболика затоа што лани, тенисерот се најде во центарот на хистеричната политичка бура во Австралија. Тој слета во Австралија, но наместо да тренира, беше затворен во грозен хотел за имигранти. Потоа беше депортиран од страна на австралиските власти и воопшто не доби можност да се натпреварува.
Заплетот почна на почетокот на јануари 2022-ра. Да се биде вакциниран против Ковид тогаш беше услов за влез во Австралија, па така и за учество на Австралиа опен. Но, затоа што Ѓоковиќ скоро имаше прележано ковид, и имаше антитела во организмот, доби медицинска дозвола за влез. Потоа имаше проблеми со визата при слетувањето во Мелбурн, а влезот му беше одбиен врз основа на тоа што не е вакциниран. Го преместија во хотел за мигранти. Набрзо, по интервенција на тогашниот министер за имиграција на Австралија, Алекс Хок, Ѓоковиќ е депортиран и спречен да игра.
Набрзо стана јасно дека причината за ваквиот третман на Ѓоковиќ не е толку грижата за јавното здравје колку неговите лични убедувања.
Според Хок, одлуката на Ѓоковиќ да не прими вакцина го прави “херој на заедницата што гаи антиваксерски чувства“. Во документите поднесени до австралиските судови, Хок тврди дека останувањето на Ѓоковиќ во Австралија и дозволувањето да се натпреварува на турнирот, би довело до „зголемување на анти-ваксерското расположение во земјата“, па дури и “граѓански немири“. Исто така, во документите се признава дека поради неодамна прележаниот ковид, тој не претставува голем ризик за себе и за тие околу себе.
Не морате да се согласувате со неговата одлука да не прими вакцина – тој има чудни ставови во врска со низа здравствени проблеми – но очигледен е проблемот во целата ситуација. Одговорот на австралискиот политички и медиумски естаблишмент беше ирационален, авторитарен и претеран. Во еден момент, тогашниот премиер Скот Морисон се закани дека ќе го спакува Ѓоковиќ во првиот авион и ќе го прати дома. И покрај тоа што Ѓоковиќ даде само неколку коментари околу вакцинацијата, во медиумите беше претставен како предводник на анти-ваксерите. Речено е дека и самото негово присуство на тлото на Австралија има коруптивно влијание врз јавноста. Душебрижниците кампуваа пред хотелот во кој беше приморан да остане, сметајќи го тоа за праведна казна за тоа што тој одбива да се вакцинира. Ѓоковиќ испадна жртвено јагне за сиот бес собран во двете години под строги рестрикции поради ковид.
За среќа, Австралија оттогаш ги укина своите ограничувања. Во јули 2022-та ја укина задолжителната вакцинација за посетители. Официјалната забрана за влез на Ѓоковиќ е укината во ноември. И, минатиот месец тој пристигна во Австралија, без никаков проблем. Се чини спласна хистеријата со која беше дочекан пред година дена.
Враќањето на Ѓоковиќ на Австралија опен е добра вест. Но, неговата минатогодишна забрана за влез во Австралија направи сериозна штета. До тој момент, тој петпати го имаше освоено турнирот, вклучително неговите последни три изданија. Тој беше оневозможен да се бори за четврта титула по ред. Во отсуство на Ѓоковиќ, минатогодишната титула ја однесе неговиот голем ривал, вториот тенисер на светот, Шпанецот Рафаел Надал. Моментално, Надал го држи рекордот по бројот на гренд-слем титули, а Ѓоковиќ заостанува за само еден трофеј. Контроверзната забрана за настап на Ѓоковиќ можеби ја промени тениската историја.
Неговото враќање во Австралија и враќањето на Западот во нормалните текови од пред ковид се добредојдени. Но, тоа не би требало да биде причина за задоволство самото по себе. Постои опасност тој период на хистерија и авторитарност тивко да отиде во заборав. Не би требало да биде така. Ако тоа се случи, ризикуваме да повториме многу исти грешки, кога нова криза ќе ни затропа на врата.
ИЗВОР: off.net.mk
