Од Регионалниот центар за управување со кризи во Прилеп се побарани дополнителни дежурни екипи од локалната Територијална противпожарна единица (ТППЕ – Прилеп) и Јавното претпријатие „Водовод“ доколку е потребно да интервенираат поради зголемениот водостој на реките
Обилни врнежи од дожд попладнево го зафатија Прилеп поради што на некои места има излевање на реката од речното корито, соопштија вечерва од Центарот за управување со кризи (ЦУК).
Од Регионалниот центар за управување со кризи во Прилеп се побарани дополнителни дежурни екипи од локалната Територијална противпожарна единица (ТППЕ – Прилеп) и Јавното претпријатие „Водовод“ доколку е потребно да интервенираат поради зголемениот водостој на реките.
„Обилни врнежи од дожд попладнево го зафатија Прилеп. Водостојот на реките е зголемен и засега на некои места има изливање на реката од речното корито во Прилеп. Од страна на раководителот на РЦУК – Прилеп побарано е од ТППЕ Прилеп и ЈП Водовод да има дополнителна дежурна екипа доколку има потреба од дополнителни сили“,
се наведува во информацијата на ЦУК, објавена на официјалниот фејсбук-профил.
Поројниот дожд што го зафати Прилеп поплавил голем дел од улиците низ градот и предизвикал тешкотии во сообраќајот.
На социјалните мрежи се споделуваат видеа и информации за поплавени куќи, локали и други објекти, а наводно имало и пожар во објект за автоделови, пренесува ТВ Телма.
Од Центарот за управување со кризи и од Авто-мото сојузот на Македонија (АМСМ) информираат дека регионалниот пат Охрид – Свети Наум, кај селото Љубаништа е во целосен прекин поради одрон на патот.
Сообраќајот на патот е во прекин од 19:15 часот, информираат од ЦУК.
ИЗВОР: 360stepeni.mk
