ЕРУСАЛИМ (АА) – Израелскиот премиер Бенјамин Нетанјаху денес разговарал со директорот на ЦИА, Вилијам Брнс, за израелската офанзива во Рафа, во јужниот дел на Појасот Газа, јавија израелските медиуми, пренесува Анадолу.
Двете страни ја истражувале можноста Израел да го запре својот напад во Рафа во замена за ослободување на заложниците кои ги држи Хамас, објави Хаарец, цитирајќи израелски официјален претставник.
На состанокот, одржан во кабинетот на Нетанјаху во Западен Ерусалим, присуствувал и шефот на израелски Мосад, Дејвид Барнеа.
Брнс пристигна во Израел рано утрово на разговори за постигнување прекин на огнот во Газа и размена на заложниците меѓу Тел Авив и Хамас.
„Сè уште има значителен јаз во преговорите за договор за заложниците во Газа“, објави порталот Вала, цитирајќи израелски официјален претставник.
Израелскиот преговарачки тим вчера пристигна во Египет на разговори за постигнување договор за прекин на огнот со Хамас.
Хамас во понеделникот вечерта соопшти дека го прифатил предлогот за прекин на огнот во Газа изготвен од Египет и Катар.
Но, Израел рече дека понудата за примирје што ја прифатил Хамас не ги исполнува нејзините клучни барања и одлучи да продолжи со операцијата во Рафа со цел да изврши, како што е истакнато, „воен притисок врз Хамас со цел да се постигне напредок во ослободувањето на заложниците и другите воени цели“.
Израел започна воена офанзива во Газа како одмазда за нападот на Хамас на 7 октомври во кој загинаа помалку од 1.200 луѓе. Оттогаш, во израелските напади врз Газа загинати се речиси 34.800 Палестинци, главно жени и деца, а 78.100 се повредени, според палестинските здравствени власти.
Речиси седум месеци од почетокот на израелската војна, огромни делови од Газа се во урнатини, 85 отсто од населението на енклавата е принудено внатрешно да се расели и наметната е целосна блокада на храна, чиста вода и лекови, според Обединетите нации.
Израел е обвинет за геноцид пред Меѓународниот суд на правдата. Во привремената пресуда во јануари се вели дека „веројатно“ е дека Израел врши геноцид во Газа и му нареди на Тел Авив да ги запре таквите дејства и да преземе мерки за да гарантира дека се обезбедува хуманитарна помош за цивилите во Газа.
Извор: Anadolu Agency (AA)
