Прославениот српски дефанзивец Немања Видиќ влегува во трска за претседателското место во Фудбалската федерација на Србија (ФСС), јави телевизијата Спортклуб.
Поранешниот српски репрезентативец и капитен на Манчестер јунајтед во октомври лани изрази желба да застане на чело на ФСС, а вчерашната посета на претседателот на УЕФА, Александар Чеферин на Белград, се толкува како еден од чекорите за реализација на идејата за кандидатура на Видиќ.
Според Спортклуб, Видиќ има поддршка од Чеферин, како и од неговиот заменик Зоран Лаковиќ.
Најавата за претседателската кандидатура на Видиќ ја поздрави и српскиот селектор Драган Стојковиќ, посакувајќи му успех со порака преку социјалните мрежи: „Со среќа легендо“.
Изборите за претседател на ФСС треба да се одржат пред март оваа година. (МИА)
ИЗВОР: kurir.mk
