Ескалацијата на вооружените конфликти на Блискиот Исток фрли сенка врз претстојната летна туристичка сезона, заканувајќи се сериозно да ги наруши клучните воздушни коридори меѓу Европа и Азија.
Она што требаше да биде година на целосно закрепнување на глобалниот туризам, преку ноќ се претвори во една од најнеизвесните сезони во последната деценија. Безбедносните ризици, затворањето на воздушниот простор над конфликтните зони и нестабилноста на енергетските пазари веќе влијаат врз плановите на патниците, кои стануваат поскапи и понеизвесни.
Холандската авиокомпанија KLM меѓу првите презеде драстични мерки, привремено суспендирајќи летови кон Тел Авив, како и кон регионални центри како Дубаи, Ријад и Дамам. Преку партнерството со Air France се стопирани и летовите кон Бејрут.
Компанијата нагласува дека безбедноста на патниците и екипажот е апсолутен приоритет, а одлуките се носат врз основа на дневни безбедносни проценки.
Овој потег предизвика „домино ефект“ во индустријата. Поради избегнување на ризичните воздушни простори, летовите се продолжуваат за неколку часа, а распоредите на големите европски аеродроми се во хаос.
Најголемиот удар за туристите доаѓа од растот на цените на горивото. Војната сериозно го дестабилизираше пазарот на енергенси, што доведе до нагло поскапување на керозинот.
Авиокомпаниите веќе воведуваат доплати за гориво, кои во некои случаи ги зголемуваат цените на билетите за неколку стотици евра – сериозен товар за семејните буџети.
Покрај цените, се појавува и ризик од недостиг на гориво на одредени аеродроми, што може да доведе до откажување на летови во екот на сезоната.
Кипар, поради близината до конфликтот, се наоѓа под посебен притисок. Иако останува безбедна дестинација, авио-сообраќајот е отежнат. Инциденти, како нападот со дронови во британската база Акротири, дополнително ја зголемуваат неизвесноста.
Во вакви услови, туристите се пренасочуваат кон „побезбедни“ дестинации. Грција бележи зголемен интерес, како и Шпанија и Португалија. За оние што сакаат да избегнат авиони, сè попопуларни се блиските дестинации како Црна Гора.
Што треба да знаат патниците:
-Следете ги летовите преку апликации на авиокомпаниите
-Бирајте флексибилни билети и аранжмани
-Размислете за патување со автомобил
-Осигурајте се со полиса што покрива откажувања
-Проверете официјални безбедносни информации пред патување
-Домашниот туризам во подем
Извор: zurnal.mk
